COVID-19 პრევენცია ფერმაში

ავტორი:სანდრო გუჯაბიძე

სტატიაში მოცემულია COVID-19-თან დაკავშირებული რეკომენდაციები, თუ როგორ შევამციროთ ფერმაში COVID-19-ის გავრცელების რისკი და როგორ დავიცვათ მუშახელის ჯანმრთელობა პანდემიურ პირობებში. მეურნეობაში დასაქმებულმა პირებმა უნდა მიიღონ შესაბამისი ზომები ვირუსის გავრცელების თავიდან ასარიდებლად. აუცილებელია ხელთათმანის და პირბადის გამოყენება როგორც მეურნეობაში მომუშავე პირების მიერ, ასევე მომხმარებლების შესაძლო ვიზიტისას. კრიტიკულად მნიშვნელოვანია სოციალური დისტანციის პრინციპების გათვალისწინება.

 

სწორი ჰიგიენის წახალისება

დასაქმებულ პირებს მიაწოდეთ შესაბამისი ინფორმაცია და უზრუნველყავით ტრენინგები COVID-19-თან დაკავშირებით:

– ფერმის ან სათბურის ტერიტორიაზე გამოაკარით COVID-19-ის პრევენციული ზომების აღმნიშვნელი ნიშნები და ბანერები. რეკომენდაციების საბეჭდი ვერსიები შეგიძლიათ მოიძიოთ https://stopcov.ge/ka/Recommendation-ზე.

– ჩაატარეთ ტრენინგი COVID-19-ის პრევენციასთან და სიმპტომებთან დაკავშირებით.

– უზრუნველყავით პუნქტები, სადაც დასაქმებულები ხელების დაბანას ხშირად შეძლებენ. დასაქმებულებს მოსთხოვეთ ხშირად დაიბანონ ხელები, მუშაობის დაწყებამდე და მუშაობის შემდგომ, ჭამისას, შესვენებისას, საპირფარეშოთი სარგებლობისას, ხელთათმანის გაკეთებამდე და მოხსნის შემდგომ, ან ნებისმიერ სხვა დროს, როდესაც შესაძლოა ხელების დაბინძურება.

– უზრუნველყავით ჰიგიენური საშუალებები, როგორიცაა სადეზინფექციო სითხე, წყალი, საპონი და ქაღალდის ერთჯერადი ხელსახოცი.

– უზრუნველყავით ხელთათმანი და პირბადე საკმარისი რაოდენობით.

– დასაქმებულებს სთხოვეთ, რომ არ გაიზიარონ სამუშაო ინვენტარი, როგორიცაა სამუშაო იარაღი, ხელთათმანი, ფეხსაცმელი და ა.შ.

 

 

 

მოახდინეთ სოციალური დისტანცირების წახალისება

ფერმაში დასაქმებულებს სთხოვეთ, რომ გაითვალისწინონ სოციალური დისტანცირების წესები და დაიცვან 2-მეტრიანი დისტანცია მუშაობისას. მოახდინეთ მუშახელის დაყოფა ჯგუფებად და დაგეგმეთ მათი მუშაობა ცვლებად, რათა არ მოხდეს ფერმაზე თითოეული დასაქმებულის ერთდროული მუშაობა. თუ შესაძლებელია, დაყავით მუშახელი ორ ან სამ ჯგუფად ისე, რომ მათი ცვლები ერთმანეთს არ ემთხვეოდეს. ცვლების განაწილება უნდა მოხდეს ისე, რომ ჯგუფის მუშაობის დასრულებიდან მინიმუმ 30 წუთის შემდგომ იწყებოდეს ახალი ჯგუფის განრიგი. ასეთ დროს, ჯგუფები ერთმანეთს საერთოდ არ შეხვდებიან და ვირუსით ინფიცირების შემთხვევაში, გავრცელების არეალი ნაკლებია. ეცადეთ ერთ ჯგუფში მოახვედროთ ერთი ოჯახის წევრები, ან ადამიანები, რომლებიც ერთად ცხოვრობენ, ან დღის განმავლობაში ფერმის გარეთაც ხვდებიან ერთმანეთს.

 

მოახდინეთ ხშირად გამოყენებული ნივთების და ზედაპირების ხშირი დეზინფექცია

აუცილებელია მუშახელის მიერ გამოყენებული შენობის, საპირფარეშოს, სატრანსპორტო საშუალების, სამუშაო იარაღების და სხვადასხვა სივრცეების ხშირი დეზინფექცია. დარწმუნდით, რომ ხდება სატრანსპორტო საშუალების/მექანიზაციის კარის სახელურების და საჭის დეზინფექცია, ოპერატორის შეცვლის დროს. თუ შესაძლებელია, შეადგინეთ დასუფთავების გეგმა და დასაქმებულებს ყოველდღიურ სამუშაოსთან ერთად სთხოვეთ სადეზინფექციო სამუშაოების ყოველდღიური ჩატარება.

 

 

 

 

იყავით მზად, გქონდეთ გეგმა

იყავით მზად ექსტრემალური სიტუაციისთვის და შეიმუშავეთ შესაბამისი გეგმა. წინასწარ განსაზღვრეთ, თუ როგორ მოახდენთ COVID-19 სიმპტომის მქონე ადამიანების იზოლირებას ჯანმრთელი ადამიანებისგან. სიმპტომური ადამიანები გაგზავნეთ ტესტირებაზე და იმოქმედეთ ტესტის შედეგიდან გამომდინარე. ინფიცირებულ ადამიანთან მყოფი პირები უნდა გადავიდნენ თვითიზოლაციაში. საჭიროების შემთხვევაში, გამოაცხადეთ კარანტინი. თუ შესაძლებელია, იყოლიეთ სარეზერვო ბრიგადა, რათა დასაქმებულებს შორის ვირუსის მასიური გავრცელების დროს მუშა ხელის პრობლემა არ წარმოიშვას.

 

პირბადე

დღესდღეობით, დაავადებათა კონტროლის ეროვნული ცენტრის და მსოფლიო ჯანდაცვის ორგანიზაციის რეკომენდაციით, საზოგადოებაში ყოფნისას აუცილებელია პირბადის ტარება. ამის მიზანია COVID-19-ის ასიმპტომური მატარებლებისგან ვირუსის გავრცელების პრევენცია. დღესდღეობით, პირბადე საუკეთესო საშუალებაა ვირუსის გავრცელების თავიდან ასარიდებლად.

დასაქმებულებს სთხოვეთ მუშაობისას ნებისმიერ დროს ატარონ პირბადე და რეგულარულად გამოცვალონ ახლით. პირბადის ტარება სთხოვეთ მოხმარებლებსაც, ვიზიტის შემთხვევაში. მოიმარაგეთ საკმარისი რაოდენობის პირბადე, რათა დღის განმავლობაში არ შეიქმნას დეფიციტი. მრავალჯერადი მოხმარების პირბადე უნდა გაირეცხოს ყოველდღიურად ცხელ წყალში, ხოლო ერთჯერადი გამოყენების პირბადე უნდა გამოიცვალოს ყოველ 2-3 საათში ერთხელ.

 

 

 

ხელთათმანი

ხელთათმანი ქმნის დამატებით ბარიერს დასაქმებულების ხელებსა და იმ ზედაპირებს შორის, რომელზედაც მათ შეხება უწევთ ფერმაში მუშაობისას. ხელთათმანი იცავს საბოლოო პროდუქტს შესაძლო დაბინძურებიგან.

რეკომენდირებულია, რომ თითოეულმა დასაქმებულმა, რომელსაც პროდუქციასთნ შეხება უწევს (ხილი, ბოსტნეული, მარცვლეული და ა.შ.) ატაროს ერთჯერადი ან მრავალჯერადი ხელთათმანი მუშაობის ნებისმიერ დროს. ასევე აუცილებელია ხელთათმანის გამოყენება სატრანსპორტო საშუალების და მექანიზაციის მართვისას, პროდუქტის მიტანისას, წმენდითი და დეზინფექციის სამუშაოებისას.

კრიტიკულად მნიშვნელოვანია ხელების დაბანა ხელთათმანის გაკეთებამდე, რათა არ მოხდეს ხელთათმანის დაბინძურება. რეკომენდირებულია ხელთათმანის გამოცვლა მოხდეს ყოველ 2-4 საათში ერთხელ. გახეული ან დაზიანებული ხელთათმანი უნდა გამოიცვალოს მყისიერად. ხელის დაბანა უნდა მოხდეს როგორც ხელთათმანის გაკეთების წინ, ასევე მისი მოხსნისას.

ნუ მოსთხოვთ ვიზიტორებს ხელთათმანის გაკეთებას. ამის მაგივრად, მოამზადეთ ხელის დასაბანი კუთხე და სადეზინფექციო სითხეები. ვიზიტორებს აუცილებლად სთხოვეთ ატარონ პირბადე ფერმის ტერიტორიაზე.