სოფლის მეურნეობის ინოვაციური პროდუქტის “აგრომეტრი”-ს პრეზენტაცია

6 ივნისს კომპანია კალოს ორგანიზებით სოფლის მეურნეობის ინოვაციური ტექნოლოგიური პროდუქტის “აგრომეტრი”-ს პრეზენტაცია გაიმართა.

აგრომეტრი შეიქმნა Agrocares-ის მიერ, რომელიც აგროტექნოლოგიების  მიმართულებით წამყვანი კომპანიაა ვაგენინგენში, ნიდერლანდებში. აღნიშნული ტექნოლოგია ნიადაგის ნაყოფიერების რეალურ დროში მონიტორინგის საშუალებას იძლევა, რათა ფერმერებმა მიიღონ ინფორმირებული გადაწყვეტილებები და გააუმჯობესონ საკუთარი სასოფლო-სამეურნეო პრაქტიკა. ოთხი მარტივი ნაბიჯის შედეგად – ნიადაგის სკანირებიდან მის ანალიზამდე – აგრომეტრის საშუალებით ფერმერებს ათ წუთში შეუძლიათ მიიღონ ნიადაგის ანალიზის დეტალური შედეგები კონკრეტული რეკომენდაციებით. ამ ინოვაციური ტექნოლოგიის დანერგვით ფერმერები შეძლებენ მოსავლის პროდუქტიულობის გაზრდას და საკუთარი საქმიანობის ადაპტაციას კლიმატის ცვლილების პირობებში. სკანერი ასევე იძლევა მცენარეში და ცხოველის საკვებში ნივთიერებების ანალიზის შესაძლებლობას, რაც უზრუნველყოფს მოსავლის მართვისა და ცხოველის კვების სრულყოფილ სერვისს.

ღონისძიების ფარგლებში გაიმართა კალოს ახლად შეძენილი აგრომეტრის და მისი ეფექტიანობის დემონსტრაცია მოსავლის ზრდის მართვაზე, მოსავლიანობის ოპტიმიზაციასა და კლიმატის ცვლილების მიმართ მდგრადობაზე. აგრომეტრის საქართველოში შემოტანა წარმოადგენს საქართველოსა და ნიდერლანდებს შორის წარმატებული თანამშრომლობის თვალსაჩინო მაგალითს და დასტურს იმისა, რომ ინოვაციური ცოდნის და პრაქტიკის ტრანსფერი პირდაპირ სარგებელს მოუტანს ფერმერებს საქართველოში.

კალოს საქმიანობა ემსახურება ფერმერებისა და სოფლის მეურნეობის განვითარების მხარდაჭერას. ონლაინპლატფორმა Kalo.ge-ს მეშვეობით, კალო საკუთარ მომხმარებლებს თავაზობს მაღალი ხარისხის სასოფლო-სამეურნეო პროდუქტებს, აგრონომიულ რჩევებს, ფინანსურ მომსახურებას და თანამედროვე ტექნოლოგიებს. კალოს მისიაა სოფლის მეურნეობა გახადოს ხელმისაწვდომი და ფერმერები აღჭურვოს საჭირო ინსტრუმენტებით, რათა მათ ეფექტიანად წარმართონ თავიანთი საქმიანობა. 

აღნიშნული ღონისძიების ფარგლებში თავი მოიყარეს დაინტერესებულმა მხარეებმა ყველა დონეზე, ვინც ჩართულია სოფლის მეურნეობის განვითარების მხარდასაჭერ აქტივობებში საქართველოში და მის ფარგლებს გარეთ. Სტუმრებს შორის იყვნენ საერთაშორისო და არასამთავრობო სექტორის, საქართველოს სახელმწიფო დარგობრივი სტრუქტურების, სოფლის მეურნეობის მიმართულებით აქტიური კერძო კომპანიების წარმომადგენლები და დარგის ექსპერტები.

დამსწრეებს სიტყვით მიმართეს კალოს დამფუძნებელმა, მარკ ვან ემბდენ ანდრესმა, კალოს აღასრულებელმა დირექტორმა, ლევან იოსებაშვილმა, საქართველოში ნიდერლანდების ელჩის მოადგილე, მაურის პაულუსენმა, საქართველოს გარემოს დაცვისა და სოფლის მეურნეობის სამინისტროს მემცენარეობის სამმართველოს უფროსმა, ნოდარ ხოხაშვილმა, სამინისტროს სამეცნიერო კვლევითი ცენტრის ლაბორატორიის ხელმძღვანელმა, გიორგი ღამბაშიძემ და ბანკი კრედო-ს კომერციულმა დირექტორმა, ნიკოლოზ ქუთათელაძემ. 

აგრომეტრის პრეზენტაციის ღონისძიება ემსახურებოდა დამსწრეებს შორის იდეების ნაყოფიერ გაცვლას, ფერმერების მხარდასაჭერ ღონისძიებებს და შესაბამის თანამშრომლობას სოფლის მეურნეობის სექტორის განვითარებისთვის.